Бүгд найрамдах Монгол ард улсын хошой баатар, Маршал Хорлоогийн Чойбалсангийн нэрэмжит Сүхбаатарын болон Цэргийн гавьяаны улаан туг, Байлдааны гавьяаны одонт Хилийн цэргийн 0198 дугаар анги, Домогт 24 дүгээр отряд болон Хошууч генерал Алтангэрэлийн Думбрайн нэрэмжит Цэргийн гавьяаны одонт Дотоодын цэргийн 805 дугаар ангид цэргийн албаа нэр төртэйгөөр хаан ирсэн эрэлхэг цэргүүдээ сумын удирдлагууд угтан авч хүндэтгэл үзүүллээ.

Хүндэт зочдоор Бор-Өндөр сум дахь Сум дундын Онцгой байдлын хэлтсийн хамт олон, Бор-Өндөр сумын Сум дундын Цагдаагийн хэлтсийн төлөөлөл, Бор-Өндөр ЕБС-ийн сурагчид, Мэргэжлийн боловсролын сургуулийн суралцагчид хүрэлцэн ирсэн юм. Мөн тус арга хэмжээг ивээн тэтгэж оролцсон “Премиум Нэксус” ХК "CU" хамт олондоо талархал илэрхийлье.

Цэргийн албанаас халагдан ирсэн залуус маань Монгол Улсын Батлан хамгаалах салбарын үндсэн хүч болох хугацаат цэргийн албанд хариуцлагатайгаар зүтгэж, цэргийн эрдэмд суралцаж сахилга бат, тэсвэр хатуужлыг өөртөө төлөвшүүлжээ. Тэд хугацаат цэргийн албаа хаах хугацаандаа нөхөрлөлийг эрхэмлэн суралцсан байна.

Эх орныхоо дархан хилийг манаж, энхийн манаанд зогссон тэдний хичээл зүтгэл, залуу насны бахархам алхмыг найз нөхөд, гэр бүл, нутгийн зон олон халуун баяр хүргэн угтлаа. Хөвгүүд маань хэл яриа цэгц, нуруу цэх залуус болжээ. Та нарынхаа цаашдын ажил амьдралд нь өндөр амжилт хүсье.

᠒᠐᠒᠕ ᠣᠨ ᠤ᠋ ᠑ ᠳ᠋ᠦ᠋ᢉᠡᠷ ᠡᢉᠡᠯᠵᠢ ᠶ᠋ᠢᠨ ᠴᠡᠷᠢᢉ ᠲᠠᠲᠠᠯᠭᠠ ᠪᠠᠷ ᠲᠠᠲᠠᠭᠳᠠᠭᠰᠠᠨ ᠴᠡᠷᠢᢉ ᠦ᠋ᠳ ᠲᠦ ᢈᠦᠨᠳᠦᠳᢈᠡᠯ ᠦᠵᠡᢉᠦᠯᢈᠦ ᠶᠣᠰᠤᠯᠠᠯ ᠤ᠋ᠨ ᠠᠷᠭᠠ ᢈᠡᠮᠵᠢᠶᠡ ᠪᠣᠯᠤᠯᠠ᠃

ᠪᠦᢉᠦᠳᠡ ᠨᠠᠶᠢᠷᠠᠮᠳᠠᠬᠤ ᠮᠣᠩᠭᠣᠯ ᠠᠷᠠᠳ ᠤᠯᠤᠰ ᠤ᠋ᠨ ᠬᠣᠱᠤᠢ ᠪᠠᠭᠠᠲᠤᠷ᠂ ᠮᠠᠷᠱᠠᠯ ᠬᠣᠷᠯᠣ ᠶ᠋ᠢᠨ ᠴᠣᠶᠢᠪᠠᠯᠰᠠᠩ ᠤ᠋ᠨ ᠨᠡᠷᠡᠮᠵᠢᠲᠦ ᠰᠦᢈᠡᠪᠠᠭᠠᠲᠤᠷ ᠤ᠋ᠨ ᠪᠣᠯᠤᠨ ᠴᠡᠷᠢᢉ ᠦ᠋ᠨ ᠭᠠᠪᠢᠶᠠᠨ ᠤ᠋ ᠤᠯᠠᠭᠠᠨ ᠲᠤᠭ᠂ᠪᠠᠶᠢᠯᠳᠤᠭᠠᠨ ᠤ᠋ ᠭᠠᠪᠢᠶᠠᠨ ᠤ᠋ ᠣᠳᠤᠨᠲᠤ ᢈᠢᠯᠢ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠐᠑᠙᠘ ᠳ᠋ᠤᠭᠠᠷ ᠠᠩᢉᠢ᠂ᠳᠣᠮᠤᠭᠲᠤ ᠒᠔ ᠳ᠋ᠦ᠋ᢉᠡᠷ ᠣᠲ᠋ᠷᠢᠶᠠᠳ᠋ ᠪᠣᠯᠤᠨ ᠬᠣᠰᠢᠭᠤᠴᠢ ᢉᠧᠨᠧᠷᠠᠯ ᠠᠯᠲᠠᠨᢉᠡᠷᠡᠯ ᠦ᠋ᠨ ᠳᠤᠮᠪᠠᠷᠠᠢ ᠶ᠋ᠢᠨ ᠨᠡᠷᠡᠮᠵᠢᠲᠦ ᠴᠡᠷᠢᢉ ᠦ᠋ᠨ ᠭᠠᠪᠢᠶᠠᠨ ᠤ᠋ ᠣᠳᠤᠨᠲᠤ ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠘᠐᠕ ᠳ᠋ᠤᠭᠠᠷ ᠠᠩᢉᠢ ᠳ᠋ᠤ ᠴᠡᠷᠢᢉ ᠦ᠋ᠨ ᠠᠯᠪᠠ ᠪᠠᠨ ᠨᠡᠷᠡ ᠲᠥᠷᠦᠲᠡᠢ ᠪᠡᠷ ᠬᠠᠭᠠᠨ ᠢᠷᠡᢉᠰᠡᠨ ᠡᠷᠡᠯᢈᠡᢉ ᠴᠡᠷᠢᢉ ᠦ᠋ᠳ ᠢ᠋ᠶᠡᠨ ᠰᠤᠮᠤ ᠶ᠋ᠢᠨ ᠤᠳᠤᠷᠢᠳᠤᠯᠭᠠ ᠨᠤᠭᠤᠳ ᠤᠭᠲᠤᠨ ᠠᠪᠴᠤ ᢈᠦᠨᠳᠦᠳᢈᠡᠯ ᠦᠵᠡᢉᠦᠯᠦᠯᠡ᠃

ᢈᠦᠨᠳᠦᠲᠦ ᠵᠣᠴᠢᠳ ᠢ᠋ᠶᠠᠷ ᠪᠣᠷᠤ᠆ᠥᠨᠳᠦᠷ ᠰᠤᠮᠤ ᠳ᠋ᠠᢈᠢ ᠰᠤᠮᠤ ᠳᠤᠮᠳᠠ ᠶ᠋ᠢᠨ ᠣᠨᠴᠤᠭᠤᠢ ᠪᠠᠶᠢᠳᠠᠯ ᠤ᠋ᠨ ᢈᠡᠯᠲᠡᠰ ᠦ᠋ᠨ ᠬᠠᠮᠲᠤ ᠣᠯᠠᠨ᠂ᠪᠣᠷᠤ᠆ᠥᠨᠳᠦᠷ ᠰᠤᠮᠤ ᠶ᠋ᠢᠨ ᠰᠤᠮᠤ ᠳᠤᠮᠳᠠ ᠶ᠋ᠢᠨ ᠴᠠᠭᠳᠠᠭᠠ ᠶ᠋ᠢᠨ ᢈᠡᠯᠲᠡᠰ ᠦ᠋ᠨ ᠲᠥᠯᠦᢉᠡᠯᠡᠯ᠂ ᠪᠣᠷᠤ᠆ᠥᠨᠳᠦᠷ ᠶᠡ‍᠂ᠪᠣ᠂ᠰᠤ‍᠆ᠶ᠋ᠢᠨ ᠰᠤᠷᠤᠭᠴᠢᠳ᠂ ᠮᠡᠷᢉᠡᠵᠢᠯ ᠦ᠋ᠨ ᠪᠣᠯᠪᠠᠰᠤᠷᠠᠯ ᠤ᠋ᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠰᠤᠷᠤᠯᠴᠠᠭᠴᠢᠳ ᢈᠦᠷᠦᠯᠴᠡᠨ ᠢᠷᠡᢉᠰᠡᠨ ᠶᠤᠮ᠃ ᠮᠥᠨ ᠲᠤᠰ ᠠᠷᠭᠠ ᢈᠡᠮᠵᠢᠶᠡ ᠶ᠋ᠢ ᠢᠪᠡᢉᠡᠨ ᠲᠡᠳᢈᠦᠵᠦ ᠣᠷᠤᠯᠴᠠᠭᠰᠠᠨ “ᠫᠷᠧᠮᠢᠦ᠋ᠮ ᠨᠧᠻᠰᠦ᠋ᠰ” ᠬᠠ‍᠂ᠻᠠ‍ ︽CU︽ ᠬᠠᠮᠲᠤ ᠣᠯᠠᠨ ᠳ᠋ᠤ ᠪᠠᠨ ᠲᠠᠯᠠᠷᠬᠠᠯ ᠢᠯᠡᠷᢈᠡᠶᠢᠯᠡᠶᠡ᠃

ᠴᠡᠷᠢᢉ ᠦ᠋ᠨ ᠠᠯᠪᠠᠨ ᠠ᠋ᠴᠠ ᠬᠠᠯᠠᠭᠳᠠᠨ ᠢᠷᠡᢉᠰᠡᠨ ᠵᠠᠯᠠᠭᠤᠰ ᠮᠠᠨᠢ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠪᠠᠲᠤᠯᠠᠨ ᠬᠠᠮᠠᠭᠠᠯᠠᠬᠤ ᠰᠠᠯᠪᠤᠷᠢ ᠶ᠋ᠢᠨ ᠦᠨᠳᠦᠰᠦᠨ ᢈᠦᠴᠦ ᠪᠣᠯᠬᠤ ᠬᠤᠭᠤᠴᠠᠭᠠᠲᠤ ᠴᠡᠷᠢᢉ ᠦ᠋ᠨ ᠠᠯᠪᠠᠨ ᠳ᠋ᠤ ᠬᠠᠷᠢᠭᠤᠴᠠᠯᠭᠠᠲᠠᠢ ᠪᠠᠷ ᠵᠢᠳᢈᠦᠵᠦ᠂ᠴᠡᠷᠢᢉ ᠦ᠋ᠨ ᠡᠷᠳᠡᠮ ᠳ᠋ᠦ ᠰᠤᠷᠤᠯᠴᠠᠵᠤ ᠰᠠᢈᠢᠯᠭᠠ ᠪᠠᠲᠤ᠂ ᠲᠡᠰᠪᠦᠷᠢ ᠬᠠᠲᠠᠭᠤᠵᠢᠯ ᠢ᠋ ᠥᠪᠡᠷ ᠲᠦ ᠪᠡᠨ ᠲᠥᠯᠦᠪᠰᠢᢉᠦᠯᠵᠡᠢ᠃ ᠲᠡᠳᠡ ᠬᠤᠭᠤᠴᠠᠭᠠᠲᠤ ᠴᠡᠷᠢᢉ ᠦ᠋ᠨ ᠠᠯᠪᠠ ᠪᠠᠨ ᠬᠠᠭᠠᠬᠤ ᠬᠤᠭᠤᠴᠠᠭᠠᠨ ᠳ᠋ᠤ ᠪᠠᠨ ᠨᠥᢈᠦᠷᠯᠡᠯ ᠢ᠋ ᠡᠷᢈᠢᠮᠯᠡᠨ ᠰᠤᠷᠤᠯᠴᠠᠭᠰᠠᠨ ᠪᠠᠶᠢᠨᠠ᠃

ᠡᢈᠡ ᠣᠷᠤᠨ ᠤ᠋ ᠪᠠᠨ ᠳᠠᠷᠬᠠᠨ ᢈᠢᠯᠢ ᠶ᠋ᠢ ᠮᠠᠨᠠᠵᠤ᠂ ᠡᠩᢈᠡ ᠶ᠋ᠢᠨ ᠮᠠᠨᠠᠭᠠᠨ ᠳ᠋ᠤ ᠵᠣᠭᠰᠤᠭᠰᠠᠨ ᠲᠡᠳᠡᠨ ᠦ᠋ ᢈᠢᠴᠢᠶᠡᠯ ᠵᠢᠳᢈᠦᠯ᠂ ᠵᠠᠯᠠᠭᠤ ᠨᠠᠰᠤᠨ ᠤ᠋ ᠪᠠᠬᠠᠷᠬᠠᠮᠠ ᠠᠯᠬᠤᠮ ᠢ᠋ ᠨᠠᠶᠢᠵᠠ ᠨᠥᢈᠦᠳ᠂ ᢉᠡᠷ ᠪᠦᠯᠢ᠂ ᠨᠤᠲᠤᠭ ᠤ᠋ᠨ ᠵᠣᠨ ᠣᠯᠠᠨ ᠬᠠᠯᠠᠭᠤᠨ ᠪᠠᠶᠠᠷ ᢈᠦᠷᢉᠡᠨ ᠤᠭᠲᠤᠯᠠ᠃ ᢈᠥᠪᠡᢉᠦᠳ ᠮᠠᠨᠢ ᢈᠡᠯᠡ ᠶᠠᠷᠢᠶᠠ ᠴᠡᢉᠴᠡ᠂ ᠨᠢᠷᠤᠭᠤ ᠴᠡᢈᠡ ᠵᠠᠯᠠᠭᠤᠰ ᠪᠣᠯᠵᠡᠢ᠃ ᠲᠠ ᠨᠠᠷ ᠤ᠋ᠨ ᠢ᠋ᠶᠠᠨ ᠴᠠᠭᠠᠰᠢᠳᠠ ᠶ᠋ᠢᠨ ᠠᠵᠢᠯ ᠠᠮᠢᠳᠤᠷᠠᠯ ᠳ᠋ᠤ ᠨᠢ ᠥᠨᠳᠦᠷ ᠠᠮᠵᠢᠯᠲᠠ ᢈᠦᠰᠡᠶᠡ᠃