Монгол Улсын сайд, Засгийн газрын хэрэг эрхлэх газрын дарга Н.Учрал, Аж үйлдвэр, Эрдэс баялгийн сайд Ц.Туваан, "Эрдэнэс Монгол" нэгдэл, Монросцветмет ТӨҮГ-ын удирдлага, мэргэжлийн баг Бор-Өндөр сумын Уулын баяжуулах үйлдвэрт өнөөдөр ажиллалаа.

Ерөнхий сайд Л.Оюун-Эрдэнийн тэргүүлж буй хамтарсан Засгийн газрын хэрэгжүүлэх 14 мега төсөлд 6 үйлдвэрлэл технологийн парк байгуулах ажил туссан. Үүний нэг нь "Бор-Өндөр" УБҮ-ийг түшиглэн байгуулагдах үйлдвэрлэл технологийн парк - Жонш, цахиур боловсруулах цогцолбор билээ. Энэхүү парк нь жоншийг гүн боловсруулж эцсийн бүтээгдэхүүн болгон экспортлох зорилготой юм.

Энэ үеэр Монгол Улсын сайд, ЗГХЭГ-ын дарга Н.Учралд сумын Засаг дарга Г.Адъяабилэгт Даланжаргалан - Бор-Өндөр чиглэлийн хатуу хучилттай автозамын гүүрэн байгууламж үерийн усанд автаж нурсан байдлыг газар дээр нь танилцуулж үүнтэй холбоотой гарсан дүгнэлт, төсөв зардал, цаашид шийдвэрлүүлэх асуудлын талаарх санал хүсэлтийг тавьж ажиллалаа.